MIFING THURUK II
(Nippon Saki-a thuchah hnuhnung)
- H. Ngurthansanga
Labor Montaine Liberi-an khawchhak lam Nippon Saki a hnen atanga finna mei fawhkai hmanga Athen thingtlang khuaah, Greek finna meipui a chheh chuan khawvel a en pup pup tawh lai chuan Nippon Saki pawh a kum a lo tam ta hle mai a. Japan ram thliarkar hmuntinah an thlamuanpui em em reng a. Amaherawhchu, a mite hmuh tur pawhin a pawn chhuak ta meuh lo. Fapa pahnih a nei a, a upa zawk Naga Saki a chu mipui tihlawm thiam leh, mipui zinga khawsak thiam tak hi a ni a, a pa pawhin a mite enkawla kaihruai tur pawhin a aiawhtu berah a hmanga. Ram mipuite pawhin an ngainaa amah lahin mipui han chawh phur velte a thiam hle a. A khat tawkin mipuite chu a pawl pawlin ruai a \hehsak \hin, intihhlimna chi hrang hrang a buatsaih \hina. A pa, Nippon Saki a thawhrimna leh a remruatna fing tak avanga ram hnianghnar an lo nih tak avanga lawmthu sawina atan a pa fakna leh chawimawina turin zaithiamte, lam thiamte, rimawi tum thiamte nen hun hlimawm tak an hmang fo va, mipui pawhin an ngaisanga, a pa a chawimawi thiam \hin em avangin an fak hle \hin a ni.
Nikhat chu, chutiang intihhlimna leh an lalber Nippon Saki a chawimawina hun pui hmanga an rik bung bung lai chuan Nippon Saki a chu taksa chak lo tak chung hian mipui zingah a lo chhuak ve a. A hmel an hmuh veleh amah lawm nan mipuite chu an lo au dur dur a. A fapa Naga Saki-a chuan zah takin apa lokal chu a lo kai a, \hutna dup nuam tak pan chuan a hruai vata. Ring taka auvin, "Hei le, ka pa duh tak kan ram leh hnam khawvel hmuha zahawma min siamtu, ei leh barah hnianghnara kan awm theihna tura a tha leh zung, a thlan far hul \hak khawpa min thawhsaktu chuan min rawn kan a nih hi, i chawimawi ang u. Amah chawimawina hla kha han sa leh teh u khai, rimawi tum thiamte khan mawi takin tum ula, lam thiamte pawh chin tawk awm lovin lam rawh u. Chawimawi hi a phu a ni, chin tawk nei hauh lovin, inren hauh lovin - amahin min hmuh lai ngei hian theihtawp chhuaha chawimawi hi kan ba a ni tih i hria ang u" a ti a.
Mipuite pawh amah chawimawia fak tur chuan an phur em em mai a. |hutna dup nuam tak an kawhhmuh bulah chuan a kal pheia, amah lawmtu leh chawimawi chak phu suau suaute chu a thlir vung vunga, \hu ta mai lo chuan mipui lamah a ban chak lo tak chu a phar chhuaka mipuite chu ngawia amah ngaichang tur chuan a ngen a.
Amah a chak tawh lo va, a thusawi tur pawh thuchah hnuhnung a ni tawh dawn tih a hriat reng avangin a lung te pawh a chhe ve hial a. Tar aw, chak tawh lo tih hriat tak, aw khur hlawk hlawk chung chuan, " Nippon, aw ka ram, ka hnam mipuite u, in tana tha leh zung ngaihtuahna senga ka theihtawp ka lo chhuah vena avanga in hlim hmel hmuh hi nuam ka va ti tehlul em. Ka theih tawk ka chhuaha, chu mi avanga ka chunga lawm nachang in hria leh, min faka, min chawimawi \hin avang hian in chungah pawh ka lawm em em a ni. Fak tlak ka nih vena te, chawimawi ka phu vena min hriatsaka chu mi kawnga nang mahni kaihruai \hintu ka fapa Naga Saki a chungah pawh hian ka lawm em em \hin a ni" a ti a.
A chak tawh loh em avangin hun eng emaw chen chu a ngawi vung vung a, a sawi leh tur hriat chakin mipuite chu an ngawi \hup mai bawk a. Tuisik thianghlim, chungnungbera min pek malsawmna van tla ti a a lo sawi fo \hin chu a han in leh te te a. A thusawi chu a chhunzawm leh ta a." He kan chenna thliarkar ram hi kan luah tantirh lai chuan hmun chhengchhia, ngaw durpui maiin a bawh luk hmun a ni \hin a. A mi cheng pawh tlemte kan ni a, kan retheiin ei tur tuihnai pawh kan nei hek lo. In pi leh pute nen \ang tlangin chung ngaw chhahpui mai chu kan thriat dar a, buh leh bal, thlai chi hrang hrang chin nan leh ran vulh nan kan buatsaih a. Chungnungbera zara ka hriat thiam ve chin chu sum leh pai, hausaknate hi van a\angin a rawn tla lo va, leilung hi hetia a awm ang hian a hausa tawka, a haichhuak hnem apiangin an nei tam mai a ni tih hi a ni a. Theihtawp chhuaha kan lo thawhna azarah chuan tun dinhmunah hian kan lo chuang kai ta. Keimahniah zarzo tur a awm tak achinah hmun hrang hrang a\angin mite an lo pem lut ve zel a, tunah chuan ram dangte awh tham khawpin kan intodelha kan lo punga, mihring pawh ka \hahnem ta hle mai. Amaherawhchu, kan neih khawlsa, buh leh bal, kan ran te hian kum tam tak a daih dawn lo va, an la ral ve dawn a ni" a ti a.
Ralkhat ram hla tak, mihring leh ranrualte chenna piah ram, ngaw durpui la inchhawp thim mup mai chu a thlir vung vunga chu lam chu a ban tha chak lo tak chu lek kangin a kawk ta a."En teh u, saw tilai mit tlin bak ram ngaw pik tak saw, sawtah sawn ka fapa naupang zawk Tokyo Saki chu a awma, tu emaw kha kal ta nal nal ula ka hnenah rawn hruai teh u khai" a ti a. A chauh em avang chuan a \hu hnawk a. A fapa upa zawk Naga Saki chuan a rawn pan thuai a "Ka pa, i chau tawh em mai hah chawl tawh rawh khai; ti rawh in chhungah kan hruai lut ang che" a rawn ti a. "Ka chau viau mai tak e, tah hian ka lo hahchawl ang a, i nau chu ka lo nghak ang e" a lo ti a.
Hun rei tak an nghah hnu chuan Tokyo Saki leh amah hruaitute chu an lo thleng ta a. A fapa a lo thleng a hmuh veleh chuan hmel hlim tak pu chungin a \hutna a \ang chuan a lo tho chhuaka, a inzawh tawh loh em avangin a tiang rinchhanin a ding thei hram hram a ni chauh tawh mai a. Chu tlangval hmel fel tak, hna a thawh nasat avang leh ni sa a tawrh nasat avanga hmai thu that mai Tokyo Saki chu a lo kuah ngawih ngawih mai a.
Mipuite chuan an chenna ram chu a hausak em avangin ram ngaw leh tlangramte chu an lo tlawh ngai lem si lo va. Lal fapa chutiang mi chu a awm ve a ni tih hria chu an lo awm bar hauh lo mai a lo ni a. Lal fapa naupang zawk hmel an han hmu ta mai chu mak pawh an ti hle mai a ni. Nippon Saki-a chuan a fapa naupang zawk dar rin chhan chuan a dinna an siam rem a, a thusawi chu a chhunzawm leh ta a.
"In hnena ka sawi tawh ang khan ka theih tawka ka thawhrimna chu tuna kan thlai chinna leh kan ranrualte tlatna hmun zawng hi a ni a, eng tikah emaw chuan heng hian min daih lo ang a, kan la khawpkham lo dawn a ni. Tuna kan luah bak tlangram ngaw dur thim khung mai te saw ro phum ruk hai chhuah ngai hmun, hausa em em mai chu a ni a. Chu chu Tokyo Saki hian a hriat avangin \hangthar lo awm zelte tan chung hmun chu a lo buatsaiha, hei in hmuh ang hian a thawhrim em avangin khawpuimi hmel pawh a pu ve lo a nih hi. A u, Naga Saki a hi chuan ka thawhrahah lawm nachang a hria a, chawimawi ka phuna laiah min chawimawi nachang a hria a, mite hmaah fak tlak ka nihzia tlangaupui nachang a hre bawk a. Chuvang chuan fak ka hlawha, chawimawiin ka awm bawk \hin, lawmawm ka ti a ni.
Amaherawhchu, hun lokal zel turah he ram leh mipuite hmakhua ka thlir hian hmun leh ram buatsaih a, rim taka hnathawh nachang hria ka fapa naupang zawk Tokyo Saki a hian kei putar Nippon Saki a hi a u Naga Saki a ai chuan min chhun zawk daih mai tih ka hria a, chu vang chuan ka ram leh hnam, ka rosumte enkawla, ka ro khawm turin Tokyo Saki a hi vawiin a\ang hian ka ruat a ni tih ka puang e. He kan luah mek kan chenna hi chu hmun hlui a ni tawh anga, naktuk a\ang chuan Tokyo Saki a chettlatna ram \ha, in tu leh fate dinchhuahna leh khawpui hlun lo ni tawh tur lamah chuan in lal thar Tokyo Saki a hnung zuiin ram \ang thei chin zawng zawng in kal anga, khawvel ram dangte hmuh pawha khaw ropui tak in din chhunzawm dawn a ni" a ti a.
Mipuite pawh chuan an lal putar mi taima ber ti a khawvelin an sawi huai huai thusawi chu a dik an ti hle a. Nippon Saki a thuchah hnuhnung avang chuan Japan ramah khaw ropui tak Tokyo a lo ding ta a. A fapa upa zawk Naga Saki–a pawh chu a pa hmaah a rawn bawk khup a, "Ka pa, khawvela mi fing ber an tih Labor Montaine Liberi- a meuh pawh hmai khaikhupa a i hma ata khawthlang pana a haw chhan ka hre ve ta. Nang chuan fakna leh chawimawina hlan ai chuan fak leh chawimawi i phu nia kan hriat ang taka nangmah entawn leh i hmachhawpte chhunzawm hi i lo ngai hlu zawk daih a lo nih hi. Fak leh chawimawi nih ai chuan mi dangte tana malsawmna ni tura taimate i ngaihlu zawk tih ka hriatin finna thuruk vawngtu i lo ni takzet tih ka hre ta a, i zara ka thil hriat chhuah hian min va tilawm ve le" a rawn ti ve ta bawk a. A pa thawhrimna avanga mipuite thlamuang taka a lo khawsakpuina pawh hriatreng hlawh tlak khawpui Nagasaki a lo ni zui ve ta a ni.
