K. Tlanghmingthanga
Ex General Secretary
Phone : 8415853053
THUHMA
Kum 50 zet chu a lo liam ve ta reng mai. Kum 1973 a\anga Chapchar Kût din thar a’n ni leh kha chu a buaithlakin a luhai thlak hle mai. Rambuai lai a nih avangin Zoram mipuite chu thim chhah takin min tuam a. Kohhran lam lahin pi pute nunhlui hnawl tawh hnu han chawh nun thar leh chu an duh loh ber mai a ni si a. Engtia hman tur nge? Engtin nge kan tih ang? Kristian takin a hman theih si loh. Mizo culture leh Kristianna chu inkalh tlat mai a ni a. Mahse, kan zirlai hruaitute leh Mizo culture-a tui mi te chuan Mizo Culture chu kan vui liam tur a ni lo kan ti ve bur mai bawk si a. Kan din thar leh ngei tur a ni. =hangtharten kan Mizo culture hi an hmuin an hre ngei tur a ni. An theihnghilh tur a ni lo, Mizo culture hi a mit tur a ni lo, tih \anin kan \ang khawng ve that thung a. A tawpah chuan, Zu leh Sa tel lovin Chapchar Kût chu Thianghlim takin i hmang ang u kan ti ta a.
Kum 1973 March ni 7 chuan Chapchar Kût chu hman a ni ta ngei a. Zu leh sa tel lovin mipui nawlpui chuan hman a ni a. Mahse, Kohhran duh loh Pl lovin Chapchar Kût chu kan lo hmang chho thei ta a. Sawrkar lam pawh a inhawng zau tial tial a, phungbawm pawh kan sawm zau tual tual bawk a. A biktakin YMA leh Zirlaite an rawn zuang lut ta. Kumtinin cultural item pawh a tam tial tial a. Mipui lam pawhin an rawn hlut tawlh tawlh a. Kohhran lam nen erawh chuan, kum 1974-1980 inkar chho kha inepna a sosan lai ber a ni awm e. Harsatna leh buaina tam tak paltlangin Chapchar Kût chu tunah chuan Mizoram chhúng leh pawnah pawh ropui taka hnam a lo ni ta a ni.
Kum 1973 a\anga Chapchar Kût dinthar leh chungchang hi mi tam takin an rawn ziak tawh na a, kum 1973-1980 inkar hi mumal taka ziak an awm theih loh avangin a tlangpui deuh chauh la khawmin ka rawn ziak ve ta a ni. Record mumal tak vawn a ni lova, chubakah, mawh phurtute zinga mi han kawm tur mumal an awm tawh bawk hek lova. Ka Diary-a mi behchhanin ka ziak ta a ni. Kum 1973-1980 chhung hi AMSF ho bul tumin huaihawt a hman a ni \hin a. Kum 1981 a\ang erawh kha chuan Kût puipa te leh chanvo neite siam a lo ni ta a. Kum 1985 a\ang phei kha chuan Sawrkarin a lo kengkawh ta a. A lawmawm hle mai. Kum 1973-a Cheng 2000/- chauh hmanga Chapchar Kût hmanga bul \an kha kan ni a. Tunah chuan, Mizoram chhung leh pawna Chapchar Kût hman nan Rs 12,430,000/- bakah sponsorship ma\angin Rs 8,50,000/- hmuh a ni a. A vaiin Rs 13,280,000/- teh meuh mai hman ral a lo ni ta. Mizo Culture hi Zofate zingah mit tawh lo se la, Chapchar Kût pawh vul zel rawh se.
19.11.2024
