ZIAKTU THUHMAHRUAI

Kan tet lai chuan kan kawmthlangah Fartuah leh Nganbawm an par vul chuk thin a, Zingkar-ah Sava chi hrang hrangin a par zu an tlan a, an hram chuah chuah thin. Nitin Sikula kan Zirtirtuten hla min zirpui, mi lian lo kal changa a hmuah naa kan sak thin :-


Kan tlang ram par vulna,

Thal khua êng riai romei karah;

Lenkawl turin nem duai,

Zai tin rimawi an chiar nghian e.

tih hlate chu a dik hlein ka hre thin.


Tlai lamah sikul kan banin kan khaw dai vel-ah kan infiam a, tlangsam bukte bawh engin, ring tak takin kan zai thin a. Kan hla sak thin pakhat ka la hriat reng chu :-

Hmana pi pu chen-a kan ram kan hmangaih chu,

Rei tak thihna huaia lo tlu tawh hnu;

Kan dinchhuah hun thlira rinawm takin,

Aw, Nang Zoram, chhan che hi ka thlang ta.

tih hla hi a ni.


Pathian ni a lo thlenin Sunday School-ah kalin khawvel lungngaihna leh buai-na la tawng ve lo naupangte khan :-

Khawvel mawi hi ka thlirin hlimnain ka khat thin,

Ni ropui takin a eng ka hmuh theih zawng chhungah;

Khawvela ka awm chhungin ka hlim ang tih ka hria,

Lal Isua ka zui zel dawn kawngtluanin.

tiin lungkham reng reng nei loin kan sa vak vak a. Khang lai khan kan khua aia nuam leh kan ram aia mawi hi a awm ka ring ngai lo. Mite anga thuziak thiam leh hla phuah thiam nih ka va chak tak em! Kan ram mawina leh nawmna te nasa taka phuah leh ziah ka duh a ni. Nimahsela ka thiam lo chung chung hian ka phuahin ka ziak ve a.


Heng ka thuziak leh hla phuahte hi ram leh hnam tan hlutna leh tangkaina a neih pawh ka ring chuang lo. Hetia ka tih ve avang hian keima lamah ka thawven ve phah thin a ni. Chanchinbua ka thu lo ziah tawhte zawng khawmin ka fapa

Rammuanthanga hi a buai em em mai a. A hmuh theih ang ang a lakkhawmzawh chuan a bua siam ve kan rilruk deuh a. Hetia kan buaipui mek lai hian kan fapa hming koh Zaidinkunga’n January 4. 2013 khan Strokein min boral san ta thut mai a, ka rilru a tihnual hle mai. Amaherawh chu amah Zaidinkunga hriatreng nan kan ti ta zawk a ni.


Lehkhabu meuha han chhuah tur chuan mahni insit a nâ duh hle mai. Pu R.Lallianzuala leh Pu Darrokimate min enpui turin ka ngen chawt mai a, Pu Darrokima phei chuan hun chep tak karah Thuhmahruaite min ziah sak a, an chungah ka lawm hle mai. Tin, Chhawrpial & L.Z Offset Press-in uluk taka min chhut sak avang pawhin lawmthu ka sawi a, a kawm mawi taka min design saktu Pu V.Lalremruata chungah pawh ka lawm takzet a ni.