Ka sirvatê a thlãwk bo ta 

Ka theihnghilh theih ngai loh chu ka rilruin a ngaihtuah chhuak leh hlawl mai a; chu thil chu hei hi a ni. Nipui inṭan chhoh hnu, April, 1974 thla tâwp lam a ni a. Ṭhianhoa thing put nuam kan tih lai a ni bawk a. Ka pa chem bang kâra a thiah chu ka lek chhuak ve a. Ka ṭhiante nên magazine kâwna innghah khâwm kan ti a, ka insiam sawk sawk a, magazine kâwn lamah chuan ka chhuk thla ve nghâl a; ka zuk thlen thlâk chuan ka ṭhiante pawh an lo kim deuh dêr tawh a; mi paruk kan ni a.

Kan sawi lâwk angin Ngawbial lamah thing put kan tum a ni. Chite lui kan thlen thlâk chuan kan châwl lawk a, a chhan chu kan chem vêl chu a remchâng lai laiah, tui bulah, Pahlira leilet pan chhohna tûr, tui ti chip chepah chuan kan tât hauh hauh a, lung no nên chem chu kan nâwt fai nghâl bawk a. Tichuan, Ngawbial lam pan chuan kan kal ta a. A hmun kan thlen chuan, mahni seh seh mualah tiin kan vâk darh sang sang a; mahni put tûr sâtin innghah khâwmna tûr kan ruat sa bawk a. Luikawr hnaih lam deuh ka pan thla a, thingse tuai ṭha zet lo awm chu ka sât ve ta arh arh a, ka sah thlûk hnu chuan, thlang lamah a zâr vêl hlawi tûrin ka chhuk thla a. Chutia a zâr ka hlawi mawlh mawlh lai chuan, ring vak loa chirp chirp tih ang thâwm ka hria a. A zâr buk deuh hnuai ka zuk keu chuan, sava note a thla la ṭha mang lo, uk deuh khik khek hi a lo awm reng mai a; ka'n en chiang a, lêngdêr sava a nih tih ka hre nghâl a. Ka zuk man a, sîn deuhin a hrâm leh chiap chiap thin a. A thlang lawkah chuan a bû ka zuk hmu bawk a; a dang ka'n zawng vêl a, ka hmu mai lo a. Tichuan, a la thlawh hleih theih loh avângin ka bul hnaiah chuan ka dah a, ka thing kih saho chu hnah bial hruiin, put theih tûrin ka têl khâwm mawlh mawlh a. Ka ipté chhûngah chuan sava pawh chu ka khung a, dimdawih a la ngai angreng a.

Tichuan, ka ṭhiante nêna innghah khâwmna tûr kan tihah chuan ka va thleng phei ta a. Mi pahnih chuan an put tûr an lo têl fel ve tawh a, kan hian dangte chu kan nghâk a. Kan ṭhian lo thleng hmasate hnênah chuan ka sava note man chu ka hmuh hlawm a, a bul vela khau awm chu kan vai paha kan pe nawk nawk bawk a. Kan \hian dangte an lo thlen kim hnuah chuan haw tûrin kan insiam ta nghâl a. Chite lui kan thlen leh chuan kan châwl leh a, ka sava no pawh chu ka'n phawrh a, a lo la harh phian mai a. Ka \hiante chuan kan thutna bul vêla hnimah chuan khau min vai khâwmpui leh a. A chaw tûr kan khâwl ngah hnuah chuan in lam panin kan haw chho ta a.

Tichuan, in kan han thlen chuan, ka nau hian a lo lâwm khawp a, ṭhenawm naupang dang nên kan kilh laih mai a. Kan chaw thingte chu kan han pe a, a âng hêk hêk reng mai a. Ka nu chuan, "In ti khawngaihthlâk mai mai chhuah daih rawh u," a lo ti sek a. Kei lah chuan, "Kan chhuah daih chuan a puiin a hmu pha tawh dâwn si lo a, a thi vat ang," ka ti tlat a. Tichuan, ka sava khawi chu khau te, chaw ṭhing kan neih ang leh a ei theih âwm apiang kan pe a, a thi mai bik lo a, a thlâ leh hmul dangte a rawn ṭo ṭha a, a rawn puitling ti tih ta mai a. Kan choka sira thingkhawn kan neih bulah a fûkna tûr thing filawr ka dah a, zânah chuan in chhûngah a fûkna tûr bâkah, a bâwm kan siam a, kan khung ṭhin a. Chhûn lamah pawh kan awm dâwn loh chuan kan khung bawk ṭhin. Hming kan phuahsak lo a, châng tum leh faifûkin kan ko ber a. Vân sâng tak takah a thlawh pawhin châng kan tûm raih chuan a râwn bir thla a, kan dârah te, kan kutah te, thingkhawn bulah te a rawn fu ṭhin a. Amah kan hmuh mai loh pawhin kan koh duh chuan châng kan tum raih chuan a rawn haw ngei ngei \hin a. Mak tak maiin a thlâwk bo ngai lo a, kan koh a hriat mai lohna hmunah pawh a kal thin a ni ang, a châng chuan a reh ve deuh \hin ná a, tlai lamah hi chuan amah pawhin a lo haw ve mai a. Kan ngaina telh telh a, mi lahin kan han ko vêl chu an hmu duh a, kan chhuah a, kan ko thla, kan ko thla thin a. 

April, 1974 thla tâwp lama kan khawi kha, December, 1974 vêlah pawh kan la kawl reng a. Ṭum khat, zinga kan thlawhtir chu kan ko pawhin a lo haw lo a; mahse, mak takin amahin chhûnah a lo haw ve leh mai a. Bâwmah kan khung phah a, chutia kan han khung chuan ni dang ang lo takin a khawhar hmêl a, a hram deuh raih raih ṭhin a. Kan khawngaih ve deuh a, kan chhuah leh thin a, a lo haw ve leh mai zêl bawk a. March 1975, nipui inṭan dâwn pawhin kan la khawi zêl a. April thla, ni 10 vel ni tain ka hria, khua a lum hle mai a, ka sava tê, ka lengdêr pawh chu ka chhuah a, vân sânga a thlâwk vêl pawh kan hmu a, ka ko thla reng bawk a. Mahse, chumi tûka ka chhuah leh chu vân sânga a thlâwk kha, amah ang bawk lêngdêr dang nên hian an thlâwk rial rial a. Kan hmuh phâk loh, Chite lui chung lamah thlâwkin, Ngawpui lamah an thlâwk ta daih a, châng tûma kan koh pawhin a lo lêt lo a, chhûnah pawh a lo lêt lo a. Tlai lamah a lo lêt ka rin tehlul nên a lo lêt ta chuang lo a. Zânah pawh kan thingkhawn bul vêl chu ka en ka en a, a hrâm hriat tûr a awm lo a, amah hmuh tûr a awm ta lo bawk a. Kan chhûngkua min tih hlim thin nên, keini chang a ni lo, kan thenawm khawvêngte pawhin an lâwm a, châng an tum hian a lo bir thla ngat ngat thin a; kan khua a ti har hle mai a. Ni hnih, ni thum, ni li a liam a, kir tûr a awm lo a. Kâr a liam hnuah pawh kir tûr a awm ta lo. Ka khua a ti har reuh lutuk, biak theih a, thil sawipui theih a ni hauh lo; mahse, hring nun a ti hlim reuh hle a. Mahse, heti hian ka ngaihtuah a, "Chhai lai di a tawng thar ang a, a tâna khawvêl tharah a chêng ve ta a ni ang e," tiin, ngai ngawih ngawih mah ila, tisa inang, duh inang kan ni lo a, Siamtu'n a duan angin, a chênna tûra a siam lêntupui chawi vêl kârah, a chhai lai di nên hlim takin chhûngkua dinin hun an hmang ta a ni ang tih ka ngaih tuah a, ka láwmpui a, ka duhsak ta zâwk a. Ka mihring nihna, mahni hma ka sialna rilru ka dah bo tial tial ta a. 

Mak tak maiin ṭum khat chu, Zangên luia thing pu bawka kan kalin, ka lunglêng deuh nge, ka zai veng veng a, thing pu kan ni a, ka ṭhiante châng tuma ka ko kha, ka bul hnai lawk, thingkûng lian vak lo zârah chuan ka lêngdêr ngei mai kha a rawn fu ta chat mai a. Kan lêngdêr ngei a ni tih ka hriatna pawh, a hmaa ka sawi hmaih, a kêah la hmul sendâng ka ṭâwn chu, chu ngei chu a la bun vâ vâ a, faifûkin ka ko a, ka bân ka dah chhuak a, ka kutah a rawn fu chat a. Chutia kan inhmu chu ka hlim a, ka ngai reuh bawk si a. Ka biangin ka nâwk thuak thuak a; mahse, ani chu ni dang ang lo takin a ṭi ta deuh a. Rei chelh chi niin ka hre ta lo a, ni danga ka thlawhtir angin ka bân ka dah sâng a, a thlâwk chhuak ta a; koh leh ka châk hle a ni. Mahse, ka rilruah, siamtu duan dân, a khawvêl leh ka khawvêl a inan loh êm avângin, kumkhuaa tawng tawh lo tûrin, phun sapin, “I khawvêl, i chhûngte, i chênna thing lenbuang bêlin kumkhua atân mang ṭha aw.” tiin ka thlah ta a, Ka siravatê a thlâwk bo ta, chuta ṭang chuan tûn thlengin ka hmu ngai ta lo, an nun a tawi êm avângin a thih tawh pawh ka ring tawh hial a ni. 

Hring nun tawi têah hian inhmangaih tawnna hi a hluin a pawimawh a, chu kan inhmangaih tawnna avâng chuan chhûngkua pawh kan inzawmna a thûk a. Kan hmangaihte kumkhuaa hmu tawh lo tûra an liam vuah vuah hi chuan thinlung hi sawi nghinin a awm \hin a, kan lung a lêng êm êm a, ṭah ni te, khawhar zual ni te a lo thleng a, min hnemtu kan mamawh ṭhin a. Mahse, keini chu he lei hi kan tâwpna mai tûr a ni lo a, BEISEINA DANG kan neih hi hre reng \hin ila ka va ti em! Keini ngei pawh hi, ka sirvate ang hian kan la thlâwk bo dâwn a ni si a.